Topp 5 hljómsveit – Kristín Gróa
20.1.2012 - Kristín Gróa
Skyndilisti settur saman í flýti. Ég ákvað að henda saman topp 5 Pixies lögunum mínum svona af því bara. Ég ætla ekkert að tjá mig um þau umfram það að þar sem ég er mikill Pixies aðdáandi þá er þetta síbreytilegur listi og hann ætti því ekki að taka of bókstaflega. Njótið!
5. Distance Equals Rate Times Time (af Trompe Le Monde)
4. Levitate Me (af Come On Pilgrim)
2. Velouria
1. Alec Eiffel
Tags: pixies
Flokkað undir Kristín Gróa | Engar athugasemdir »
Föstudagslagið
20.1.2012 - Georg Atli
Föstudagslagið að þessu sinni er meira en viðeigandi. Í gær þá sendi ein af uppáhaldshljómsveitum Topp 5, Prinspóló, frá sér nýtt lag og það heiti Föstudagsmessan. Þið getið hlustað á (og keypt ykkur) lagið á gogoyoko og svo er líka búið að gera þetta fína myndband við lagið. Það var Árni +1 sem pródúsar og Prinsinn sjálfur leikstýrir ásamt Berglindi Häsler.
Tags: Prinspóló
Flokkað undir Föstudagslagið, Georg Atli | Engar athugasemdir »
John Grant fyrir 500 kall!
16.1.2012 - Georg Atli
Á morgun fer fram stórviðburður í tónlistarlegum skilningi, þegar að John Grant kemur fram á tónleikum í Edrúhöllinni. Tónleikarnir eru hluti af tónleikaröðinni Kaffi, Kökur og Rokk og Ról (facebook event) sem Arnar Eggert Thoroddsen hefur haldið utan um fyrir SÁÁ.
Tónleikarnir byrja kl. 20:30 (húsioð opnar kl. 20:00) og standa til 22:00, það kostar skitnar 500 krónur inn og Myrra Rós ætlar að hita upp. Þetta er eitthvað sem að tónlistarsinnaðfólk á ekki að missa af.
John Grant gaf út plötunar Queen of Denmark á árinu 2010 og þá hlaut hún frábæra dóma og var á nokkrum stöðum valin plata ársins. Persónulega missti ég alveg af henni en sem betur fer náði ég að sjá hann spila á síðastliðinni Airwaves þar sem að hann var einn af hápunktum hátíðarinnar. Í Edrúhöllinni verður hann einn á ferð og mun spila á píanó og ef það er eitthvað að marka Airwaves og/eða youtube þá verður þetta magnað.
Fáum smá tóndæmi frá manninum, annarsvegar af plötunni og svo live (mæli sérstaklega með því).
Tags: John Grant
Flokkað undir Georg Atli, Tónleikar | Engar athugasemdir »
Topp 5 íslenskar plötur ársins 2011 – Georg Atli
13.1.2012 - Georg Atli
2011 var frábært ár fyrir íslenska tónlist, ég held að ég hafi aldrei haft eins mikið að góðum og frábærum plötum á árslista. Þetta voru reyndar svo margar plötur að ég neyðist til þess að svindla eina erðina enn og koma með miklu lengri lista… og meira að segja að tvískpta listanum sem er ekki topp 5 listinn!. Fyrst koma plötur sem voru sérstaklega góðar eða skemmtilegar eða áhugaverðar og örstutt um hverja plötu.
Mugison – Haglél – Mér finnst þetta vera sæmileg plata með 11 frábærum lögum (sem er kannski ekki rökrétt en samt satt)
Gus Gus – Arabian Horse – Partýplata ársins
FM Belfast – Don‘t Want to Sleep – Eftirpartýplata ársins
Gang Related – Stunts and Rituals – Hressandi nútímastrandarpopprokk í anda Beach Boys
Ham – Svik, Harmur og Dauði – Endurkoma ársins
Futuregrapher – TomTom Bike – Frábært plata sem fór allt of lítið fyrir
Samaris – Hljóma Þú E.P. -Krútraftónlist
Fist Fokkers – Emilio Estavez E.P. – Frábært. Með epískari live böndum íslands.
Dad Rocks! – Mount Modern – Íslenskur Bill Callahan. Reynið að hlusta á lagið Funemployment án þess að fíla það.
Næst koma plötur sem að voru ótrúlega nálægt 5 sætinu á listanum mínum:
Daníel Bjarnason & Ben Frost – Solaris – Klassíska plata ársins
NOLO – Nology – Skemmtilegasta plata ársins.
Skurken – Gilsbakki – Raftónlistarplata ársins.
Of Monsters and Men -My Head is an Animal – Poppplata ársins.
Náttfari – Töf – Síðrokkplata ársins og 6. sætið á listanum mínum
oooog svo Topp 5 plötur ársins!
5. Sóley – We Sink
Ég var búinn að bíða spenntur eftir þessari plötu síðan e.p. platan hennar kom út í fyrra. Ég varð ekki fyrir vonbrigðum. Sóley tekst að búa til einhvern ótrulega fallegan hljóðheim sem að maður getur ekki annað en sogast inn í.
4. Lay Low – Brostinn Strengur
Lay Low gerði frábæra plötu með frábærum lögum við frábær ljóð nokkura kvenna. Það passar ótrúlega vel við hana að syngja á íslensku og hún nær rosa vel inn á þessa íslensku tilfinningu.
3. Reykjavík! – Locust Sounds
Stórkostleg plata í alla staði. Reykjavík! náði að rífa hljóminn sinn upp á alveg nýtt plan og gæði tónlistarinnar urðu miklu meiri.
2. Sin Fang – Summer Echoes
Sindri er örugglega einn af ferskari og frumlegri tónlistarmönnum Íslands. Hann hleður upp hljóðum og tónum í einhverja ótrúlega flókna tónlistarsúpu þar sem að maður heyrir eitthvað nýtt við hverja hlustun.
1. Snorri Helgason – Winter Sun
Einfaldlega besta plata ársins. Frábær í alla staði, lögin og útsetningarnar eru góðar, textinn er góður og hljóðfæra leikurinn góður. Snorri Helgason fann sig greinilega ótrúlega vel í stúdíóinu með Sindra (Sin Fang og Seabear).
Tags: Lay Low, Reykjavík!, Sin Fang, Snorri Helgason, Sóley
Flokkað undir Georg Atli, Listar | Engar athugasemdir »
Topp 5 íslenskar plötur 2011 – Kristín Gróa
13.1.2012 - Kristín Gróa
Árið 2011 er í mínum huga ár íslenskrar tónlistar. Það kom út alveg gríðarlegt magn af vönduðum og skemmtilegum plötum og ég hef persónulega aldrei hlustað jafn mikið á íslenska tónlist. Húrra fyrir íslenskum tónlistarmönnum! Að vanda skulum við byrja á 10 plötum sem náðu ekki á topp fimm en mér þykir samt vert að minnast á:
Lay Low – Brostinn strengur
GusGus – Arabian Horse
Snorri Helgason – Winter Sun
Nolo – Nology
Vigri – Pink Boats
FM Belfast – Don’t Want To Sleep
Orphic Oxtra – Kebab diskó
Gang Related – Stunts & Rituals
ADHD – ADHD2
Ben Frost & Daníel Bjarnason – SÓLARIS
5. Reykjavík! – Locust Sounds
Rokkplata ársins! Gríðarlega metnaðarfull og skemmtileg plata sem rokkar fyrir allan peninginn. Ég hafði fram að þessu aldrei hlustað mikið á Reykjavík! en hafði horft dáleidd á þá live enda leitun að betra live bandi. Nú er ég farin að hlusta og mun aldrei hætta.
4. Mugison – Haglél
Þetta er líklega plata ársins svona almennt séð enda náði hún til allra. Ég hef aldrei hitt neinn sem hefur nokkuð slæmt um Mugison eða hans tónlist að segja og þar held ég einmitt að töfrarnir séu. Hann er allra. Hann er nógu kúl fyrir hipsterana en nógu alþýðlegur fyrir ömmurnar. Allir vinna. Það er frábært að sjá viðtökurnar við þessari plötu og þær eru algjörlega verðskuldaðar. Þetta er í raun látlaus lítil plata en stundum er minna meira.
3. Sin Fang – Summer Echoes
Þessi plata er líklega andstaðan við Haglél. Hér er ekkert lítið, látlaust eða einfalt heldur allt svo gríðarlega flókið og samofið að þegar ég hlusta þá get ég ekki annað en velt því fyrir mér hvernig í fjáranum maðurinn fer að því að láta þetta allt passa svona fullkomnlega saman. Mér finnst platan sterk út í gegn en ég heillaðist samt mest af laginu Fall Down Slow sem varð mitt fyrsta ofspilaða lag ársins 2011.
2. Sóley – We Sink
Ég viðurkenni að þegar ég hlustað á Theater Island í fyrsta sinn þá náði ég henni ekki alveg en eftir að hafa séð Sóley spila live þá gaf ég henni annan séns og heillaðist algjörlega. Ég beið því We Sink með mikilli eftirvæntingu og varð engan veginn fyrir vonbrigðum. Mér finnst ég vera að fara inn í annan heim þegar ég set þessa plötu af stað og í hvert sinn hlusta ég frá upphafi til enda… nema kannski þegar ég er að spila Smashed Birds á repeat en það er algjörlega uppáhalds. Það er líka alveg ofboðslega gaman að heyra lögin af plötunni live en Sóleyju og Jóni Óskari tekst á einhvern undraverðan hátt að spila bara tvö en koma samt öllu til skila.
1. Of Monsters And Men – My Head Is An Animal
Það má alveg ásaka mig um að vera hlutdræga þegar kemur að Of Monsters And Men og ég skal alveg gangast við því. Ég get hins vegar lofað því að ég myndi ekki setja þau á toppinn á árslistanum mínum óverðskuldað og staðreyndin er sú að hef ekki hlustað jafnmikið á nokkra íslenska plötu á árinu. Mér finnst hún alltaf skemmtileg, fæ aldrei leið á lögunum og syng með hverju lagi. Mér finnst ekki eitt slakt lag á þessari plötu og ég er ekki hissa á að EP platan Into The Woods hafi toppað Billboard Heatseekers listann. Framtíðin er björt!
Tags: adhd, Ben Frost, Daníel Bjarnason, FM Belfast, Gang Related, GusGus, Lay Low, Mugison, Nóló, of monsters and men, Orphic Oxtra, Reykjavík!, Sin Fang, Snorri Helgason, Sóley, Vigri
Flokkað undir Kristín Gróa, Listar | Engar athugasemdir »
Annáll Kimi Records
13.1.2012 - Kristín Gróa
Kimi Records átti glimrandi gott ár í músík og stóð að útgáfu nokkurra hljómplatna sem hafa fengið prýðilegar viðtökur, eins sáu þeir um dreifingu og kynningu á nokkrum titlum. Árið hófst með útgáfu á annarri breiðskífu Sin Fang, Summer Echoes, en hún kom út í mars. Fékk hún prýðilegar viðtökur, en fólki þykir þetta að öllu jöfnu mjög góð plata. Því næst kom platan Don’t Want to Sleep með FM Belfast (Morr music gaf út). Platan fór í verslanir þann 3. júní síðastliðinn. Í ágúst gáfum við út aðra breiðskífu Snorra Helgasonar og nefnist hún Winter Sun. Sú plata féll vel í kramið hjá skrípentum og hlustendum og meðal annars valdi Dr. Gunni hana sem plötu ársins.
Um mitt sumar fór allt að tryllast á skemmtistöðum miðborgarinnar sökum óvæntasta smells ársins. Niðrá strönd í sexy schidt endurgerð fékk fólk til að æpa af fögnuði og gleði. Í tilefni því gaf Kimi lagið út á rafrænu formi í þessari dansvænu útgáfu og var því vel tekið.
Í lok ágúst gáfu jaðarjazzararnir í ADHD út sína aðra breiðskífu, ADHD 2 og sömuleiðis komu út plöturnar Stop That Noise með Hellvar og Hermigervill leikur fleiri íslenzk lög, en Kimi sá um dreifingu á þessum titlum.
2. september gáfum við út plötuna We Sink (í samstarfi við Morr music) með henni Sóley. Sú plata endaði ofarlega á flestum árslistum og þykir platan frábær í alla staði.
Þann 1. október kom platan Haglél út með Mugison og hefur hún slegið öll met og hefur meðal annars verið seld í um 28 þús eintökum. Um miðjan október komu svo út tvær plötur. Við upphaf Airwaves hátíðina kom út platan Mount Modern með Dad Rocks! í tilefni af fyrstu tónleikum hans hér á landi, en Snævar Albertsson er að öllu jöfnu búsettur í Danmörku. Svo kom út platan Locust Sounds með Reykjavík!, 14 laga plata sem fer alla leið í rokkinu.
Sömuleiðis gáfum við í Kima út okkar fyrstu kvikmynd, í samstarfi við Kjartansson ehf, en myndin Backyard kom út á DVD og fylgir hljómdiskur með myndinni og inniheldur hann lög úr myndinni.
Í nóvember kom svo út platan Nology með Nolo. Unggæðingarnir úr úthverfum höfuðborgarinnar enduðu útgáfuárið okkar með bravúr, en platan þykir unaðsleg.
Í apríl hélt Kimi Records sína fyrstu tónlistarhátíð og kölluðum við hana Reykjavík Music Mess, þar úði og grúði af músík og minnistæðustu tónleikar hátíðarinnar voru frábærir tónleikar Deerhunter, goðsagnakennd framkvæmd Sudden Weather Change á tónlist Ghostigital, en þar nutu þeir aðstoðar Einars Arnar Benediktssonar. Reykjavík Music Mess verður svo haldin aftur á þessu ári, en að þessu sinni í maí.
Allt í allt gott ár hjá þeim tónlistarmönnum sem Kimi leggur lag sitt við.
Tags: adhd, Dad Rocks!, Deerhunter, FM Belfast, Ghostigital, Hellvar, Hermigervill, Kimi Records, Mugison, Nóló, Prinspóló, Reykjavík!, Sin Fang, Snorri Helgason, Sóley, Sudden Weather Change
Flokkað undir Kristín Gróa | Engar athugasemdir »
Föstudagslagið
13.1.2012 - Georg Atli
Í dag er föstudagurinn 13. janúar og þá eru víst fá lög jafnvel við hæfi og þetta!
Tags: Stevie Wonder
Flokkað undir Föstudagslagið, Georg Atli | Engar athugasemdir »
Annáll Bedroom Community
13.1.2012 - Georg Atli
Nokkur af minnisstæðustu viðburðum Bedroom Community útgáfunnar á árinu 2011:
-Bedroom Community fjölskyldan stækkaði; Puzzle Muteson gaf út sína fyrstu plötu En Garde í júní.
-Nico Muhly frumflutti tvær óperur; Two Boys og Dark Sisters auk þess að semja talsvert fleiri verk.
-Ben Frost og Daníel Bjarnason fluttu verkið SÓLARIS á völdum stöðum og gáfu svo út plötuna í nóvember við frábærar undirtektir.
-Ben vann einnig með Brian Eno sem hluti af Rolex verkefninu 2010-2011, samdi tónlist við kvikmyndirna Sleeping Beauty og The Invisibles og valdi hljómsveitir á Donau hátíðina.
-Daníel frumflutti nýtt verk í byrjun ársins – Birting- sem var svo tilnefnd til Íslensku tónlistarverðlaunanna sem Tónverk ársins en Daníel var jafnframt tilnefndur sem Tónhöfundur ársins.
-Valgeir Sigurðsson samdi Nebraska fyrir Chiara Quartet, samdi tónlistina við Architecture of Loss eftir danshöfundinn Stephen Petronio og var afar upptekinn í hinum ýmsu hljóðverum þar sem hann vann m.a. tónlist með Bedroom Community listamönnunum, Feist, Damon Albarn og Hilary Hahn & Hauschka.
-Fyrsta kvikmynd útgáfunnar leit dagsins ljós. Everything Everywhere All The Time var frumsýnd á Alþjóðlegri kvikmyndahátíð í Reykjavík og svo sýnd á CPH:DOX kvikmyndahátíðinni í Danmörku.
-Hljóðverið Gróðurhúsið var tekið í gegn og fékk fjölmargar heimsóknir.
-Bedroom Community áttu stórt ár á Iceland Airwaves hátíðinni, með eftirminnilega tónleika Puzzle Mutesoná Iðnó, flutningi á verkum eftir Daníel og Valgeir ásamt Sinfóníuhljómsveit Íslands í Eldborgarsal Hörpu og hinna árlegu off venue tónleika á Kaffibarnum.
-Líkt og síðasta ár var svo lokahnykkurinn Yule, áður ófáanlegt efni eftir Bedroom Community listamennina sem hægt var að nálgast frítt ef verslað var í gegnum vefsíðu útgáfunnar í desember.
Framundan er svo ekki síðra ár, en útgáfan vill þó lítið gefa upp um 2012 plön sín. Nýjum viðbótum við Bedroom Community er þó lofað sem og aktífu ári.
Hér má sjá listamenn útgáfunnar telja upp þeirra minnisstæðustu viðburði ársins.
Og athugið að hægt er að taka þátt í Facebook leik útgáfunnar, neðst í fréttinni, þar sem 12 heppnir verða dregnir út og geta valið sér Bedroom Community plötu.
Tags: Ben Frost, Daníel Bjarnason, Nico Muhly, Puzzle Muteson, Valgeir Sigurðsson
Flokkað undir Georg Atli | Engar athugasemdir »
Annáll Möller Records
13.1.2012 - Georg Atli
Nú er árið 2011 liðið og í dag gerum við svo tónlistarárið endanlega upp með því að birta íslenska árlistann okkar. Það verður að segjast að þetta var óvenju gott tónlistarár (2011) og þá sérstaklega hvað varðar íslensku hliðina, en það dældust út frábærar plötur allt árið. Á síðasta ári þá höfðum við samband við 2 bestu plötuútgáfur Íslands (Record Records og Kimi Records) og báðum þær að skrifa okkur svona annál eða ársuppgjör. Þær tóku svo rosa vel í þetta að við ákváðum að prufa aftur en núna þá bættum við aðeins við og í dag birtast annálar frá Bedroom Community og Kimi Records. Til að starta þessu þá kemur hér smá pistill frá Möller Records, sem átti frábært ár og það verður að segjast að hún er góð viðbót við tónlistarflóruna hér á landi. Þess má geta að safnskífa þeirra Compilation Helga er enn fáanleg (ókeypis) til niðurhals
Möller Records árið 2011
2011 var frábært ár hjá Möller Records. Möller Records, eða Möller Forlagið, var stofnað í Janúar 2011 af þeim Árna Grétari (b.þ.s. Futuregrapher) og Jóhanni Ómarssyni (b.þ.s. Skurken). Forlagið gaf út 4 breiðskífur í það heila, 2 smáskífur, 1 stutt-albúm og 1 safndisk. Öllum útgáfunum var vel tekið í íslenskum fjölmiðlum og er vert að minnast velgengni Gilsbakka með tónlistarmanninum Skurken, en hann fékk tilnefningu í Kraumlistanum og fékk frábæra dóma, bæði hérlendis og erlendis (t.a.m. fjórar stjörnur bæði í Fréttablaðinu og í Fréttatímanum). Eins tók Möller Forlagið þátt í Airwaves tónleikahátíðinni, með Biogen Tribute tónleikunum, sem voru mjög vel heppnaðir og svo hélt Möller utan um Heiladans tónleikaseríuna, sem er mánaðarleg tónleikakvöld á Nýlenduvöruverslun Hemma & Valda sem var mjög áberandi í tónlistarlífi Reykjavíkur.
Árið hófst á útgáfu annarri breiðskífu Prince Valium og smáskífu frá tónlistarmanninum Tonik, sem innihélt hið geysivinsæla lag ‘Life’s a Beach‘. Næstu útgáfur sem fylgdu var breiðskífa frá hljóðsmalanum Steve Sampling og fyrsta verkið frá Fu Kaisha. Gilsbakki með Skurken kom svo út í haust og fyrsta platan hans Murya kom út stuttu síðar. Hápunktur vetrarins í íslenskri raftónlist var svo útgáfan á safnskífunni Helga (kom út 14. Nóvember) þar sem 7 tónlistarmenn á vegum Möller’s (ásamt Arnari Helga, b.þ.s. HaZaR) stóðu að 10 frábærum lögum fríkeypis til niðurhals á vefsíðu Möller. Núna í Desember kom svo út hin frábæra plata Halftime með hinum vinsæla Intro Beats.
Möller Records drengirnir eru mjög þakklátir fyrir allan þann stuðning sem þeir hafa fengið á árinu 2011 og líta björtum augum til íslenskt tónlistarlífs árið 2012, þar sem allir kjallarar og kirkjur birta til í gleði gaum þeirrar snilldar sem við íslendingar erum vanir að matreiða. Veljum Íslenskt – Veljum Möller!
Kv.
Árni Grétar og Jóhann Ómarson
Tags: Futuregrapher, HaZar, Intro Beats, Murya, Skurken, Steve Sampling, Tonik
Flokkað undir Georg Atli | Engar athugasemdir »
