Topp 5 Það sem ég er að hlusta á núna – Georg Atli

14.5.2012 - Georg Atli

Við ákváðum að skella þessum lista svona inn í áður auglýsta dagskrá af því að það er alltaf gaman að segja frá því sem að maður er að hlusta á í augnablikinu en einhvern veginn tókst mér bara að gleyma því fullkomlega. Ég set minn því bara inn núna og vona að öllum sé sama.

Ég dett alltaf inn í einhverjar ákveðnar stefnur og hlusta þá bara rosalega mikið af einhverri tónlist sem fellur á einn eða annann hátt undir þá tónlistarstefnu, fæ svo leið á því og færi mig í eitthvað annað. En svo getur það alltaf gerst ég heyri eitthvað sem er mjög ólíkt því sem ég er að hlusta á og þá bæti ég því alveg inn á milli en yfirleitt þá er það bara eitthvað eitt í einu, t.d. er ég núna að hlusta mikið á elektróníska tónlist og listinn minn í dag einkennist frekar mikið af því.

5. Aphex Twin – Windowlicker

Einhvern tímann þá heyrði ég málshátt sem var svona: “ef maður einusinni segir A þá verður maður að segja B.” Mér finnst þetta kjánalegur málsháttur en í þetta skiptið á hann við, því að ef að maður er byrjaður að hlusta á Squarepusher (sjá aðeins neðar) þá verður maður að hlusta á Aphex Twin. Það er þannig að maður getur gripið inn hvar sem er í Aphex Twin plötusafninu, það er allt gott þar.

4. Modeselektor (feat. Thom Yorke) -This

Ég er mikill aðdáandi Modeselektor og sá þá (svona á ská eða þannig) meðal annar á trylltum tónleikum í listasafninu á Airwaves 2010 (Undir Nafninu Moderat með snillingnum Apparat). Þeir voru að gefa út mjög fína plötu sem heitir Monkeytown, tjékkið á henni. Lagið sem ég er nánast með á repeat þessa dagana er lag sem Thom York syngur, það heitir This og er magnað!

3. Tilbury – Picture

Þetta er dæmi um lag/plötu sem er nógu góð til þess að brjóta comboið (er ekki raftónlist). Ég er að vinna í því að skrifa umfjöllun um þessa og þið getið vonandi lesið um hana sem fyrst en í rosalega stuttu máli þá er platan rosa góð og þetta lag er best, en meira um það næst.

2. Squarepusher – Dark Steering

Squarepusher er fáránlega snjall og þessi nýja plata hans er ótrúlega góð. Ég hef ekki töluna á því hversu oft ég hef hlustað á þetta lag á síðustu vikum en það er rosalega oft.

1. Beastie Boys – Sabotage

Adam ‘MCA’ Yauch dó úr krabbameini um daginn. Þegar að ég las fréttina þá verð ég að viðurkenna ég fékk smá afall. Ég hef fylgst með Beastie Boys í langann tíma og þeir urðu þess valdandi framar öðrum hljómsveitum að ég fór virkilega að pæla í tónlist. Ég fór að grennslast fyrir um öll frábæru sömplin sem þeir notuðu. Þetta var fyrsta uppáhalds hljómsveitin mín og eina hljómsveitin sem ég get sagt að ég kunni nánast allan lagakataloginn ca. utan að. Eftir mörg ár á ég örugglega eftir að muna hvar ég var þegar að ég heyrði að hann væri dáinn (og Michael Jackson en það er vegna þess að ég var að undirbúa afmæli afa míns), eitthvað sem er ólíkt öðrum tónlistarmönnum. Ég er samt ekkert einn um þetta því að það eru fullt af minningargreinum um hann út um allt á vefnum en það er samt eitt sem virðist gleymast. MCA var nefnilega fantagóður bassaleikari og lagið sem ég hef hlustað hvað oftast á undanfarna daga er eitt af vinsælustu lögum Beastie Boys og skartar gríðarlega einkennandi bassalínu (sérstaklega introið) sem Adam Yauch samdi einmitt og spilaði.

Tags: Aphex Twin, Beastie Boys, Moderat, Modeselektor, Squarepusher, Tilbury
Flokkað undir Georg Atli, Listar | Engar athugasemdir »

Topp 5 það sem ég er að hlusta á núna

11.5.2012 - Kristín Gróa

Þar sem ég bý í Bandaríkjunum og er með áskrift að Spotify þá hef ég aðgang að gríðarlegu magni af tónlist. Þetta getur verið bæði blessun og bölvun. Það góða er að ef ég les um eitthvað áhugavert þá get ég tékkað á því samstundis. Það slæma er aftur á móti að þegar það er úr svona mörgu að velja þá fallast mér pínu hendur, stari hugmyndalaus á tölvuskjáinn og dettur ekki í hug neitt til að leita að. Það sem hefur ómað nokkuð oft á heimilinu upp á síðkastið er þó eftirfarandi.

5. Spiritualized

Mér finnst nýja platan, Sweet Heart Sweet Light, alveg frábær og ef þið hafið ekki séð myndbandið við Hey Jane þá mæli ég með að þið horfið á það núna. Það er svakalegt.

4. Alex Winston

King Con hefur verið í spilun hjá mér öðru frá því hún kom út í mars. Þetta er rosalega poppað en þar sem ég orðin svo mikil poppari þá fíla ég það bara!

3. David Ackles

Ég hafði heyrt nafn þessa manns en ekki nógu oft til að það hafi hvatt mig til að hlusta á hann. Það var ekki fyrr en ég var að renna í gegnum plötusafn John Peel sem er farið að birtast í 100 platna skömmtum sem ég hlustaði loksins. Hvernig… HVERNIG… get ég ekki hafa hlustað á þennan mann áður? Ég setti fyrstu plötuna hans, David Ackles, á og var gjörsamlega heilluð frá fyrsta tóni. Þetta er æðisleg plata. Takk John Peel.

2. Daughn Gibson

Pínu hæpað en ekki að ástæðulausu. Þetta er eiginlega lágstemmt og nútímalegt indíkántrí sem hefur verið snúið aðeins á hlið. Já eða eitthvað þannig. Platan All Hell er þægileg, pínu skrítin en umfram allt áhugaverð.

1. The Shins

Ég hef verið mikill Shins aðdáandi lengi svo ég var pínu stressuð yfir því að Port Of Morrow yrði ekki góð en svo er hún bara algjörlega frábær. Einhvernveginn tókst James Mercer að búa til plötu sem er sama af því sem maður elskar en samt ný og fersk. Umfram allt þá er maðurinn alveg gríðarlega sterkur lagasmiður og ég fullyrði að það er ekki eitt slakt lag á þessari plötu. Ég er búin að hlusta á þessa frá því hún kom út og það er ekkert útlit fyrir að ég fái leið á henni.

Tags: Alex Winston, Daughn Gibson, David Ackles, Spiritualized, The Shins
Flokkað undir Kristín Gróa, Listar | Engar athugasemdir »

Topp 5 lög sem ég uppgötvaði á Topp 5

9.5.2012 - Kristjana

Þegar maður býr í útlandinu og fær helgarheimsókn frá heimahögum fær allt annað að sitja á hakanum – sem er akkurat það sem gerðist hjá mér síðasta föstudag, með hálfskrifaðan lista. Ég ætla því að stelast til að smygla honum inn núna…

Ég er löngu búin að missa töluna á lögum sem ég hef uppgötvað vegna Topp 5, ýmist á síðunni sjálfri eða á einhvern hátt í gegnum hina topp fimmarana – á spjallinu, í óteljandi e-mailunum, þegar ég skrepp með þeim á tónleika eða bara yfir topp 5 grillmat. Þessi fimm eru því brotabrot, 5 góð lög sem ég uppgötvaði á Topp 5 og hlusta reglulega á.

5. Booker T & the MG’s – Green Onions

Eitt af þessum lögum sem ég hafði margoft heyrt en alltaf hjá einhverjum öðrum og hafði bara ekki hugmynd um með hverjum það væri. Ég hafði bara aldrei pælt neitt í því fyrr en Kristín skrifaði um það. Ég uppgötvaði því lagið kannski ekki, per se, en hef þó hlustað miklu meira á það eftir ‘uppgötvunina’ því nú get ég skellt því á sjálf

4. TThe Ruby Suns – Oh, Mojave

Kristín Gróa skrifaði fyrir rétt rúmum 4 árum:
“Þetta er ekki dæmigerð indírokkplata því það liggur frekar við að hægt sé að kalla þetta (Krissa lokaðu augunum núna) world music! Gahh! Ekki hlaupa öskrandi í burtu samt því þessi plata er uppfull af gleði og ljúfum tónum, sumari og yndislegum glundroða.”
Sem hún og er. Og þetta lag greip mig svo svakalega strax að ég hef hlustað á það reglulega síðan. Oft oft oft. Þetta hefur m.a. verið á ferðaplaylistum, workout playlistum og vinnu playlistum og fær mig alltaf til að brosa þegar ég heyri það.

Dan Deacon – The Crystal Cat

Crystal Cat náði einhvern veginn að fara framhjá mér þar til Kristín skrifaði um það hér. En það er allt í lagi því ég er búin að hlusta svo oft á það síðan að ég hef náð að vinna upp þessa mánuði sem ég missti af í byrjun og vel það. Þetta lag var á lokaverkefnisplaylistanum mínum síðasta haust og var því ansi oft spilað um miðjar nætur í vinnustofunni – þá tókum við mini-dans milli þess sem við lóðuðum, smíðuðum og jafnvel saumuðum. Good times.

Eins gaman og það er að dansa eins og vitleysingur við þetta lag í brjáluðum troðningi þá er líka lúmskt gaman að labba heim úr vinnu/skóla með það í headphonunum, boppandi hausnum með og brosandi út að eyrum. Eða er það kannski bara ég?

Gil Scott-Heron – Me and the Devil og New York is Killing Me

Gil Scott-Heron er svona gaurinn sem ég hafði heyrt um en af einhverjum ástæðum aldrei tékkað almennilega á. Eftir að Georg skrifaði svo um hann í plötu mánaðarins í mars 2010 lenti platan á repeat í ansi langan tíma. Í framhaldinu gat ég svo ekki annað en hlustað á allt sem ég komst yfir með honum (og blótað sjálfri mér í sand og ösku fyrir að hafa ekki byrjað að hlusta á hann fyrr). Góð uppgötvun, þó seint kæmi, og platan í miklu uppáhaldi hjá mér enda alveg hreint ótrúlega góð. Takk Georg!

Thao & Mirah – Eleven og Rubies and Rocks

Vorið 2008 sá ég Xiu Xiu spila en varð fyrir hálfgerðum vonbrigðum því þetta var ekki þeirra kvöld. Þau voru eiginlega bara ekkert spes. Hins vegar var Thao Nguyen að hita upp og hún var frábær. Ég fór því beint til hennar eftir tónleikana, keypti We Brave Bee Stings and All og hlustaði ansi mikið á þá plötu það árið.

Fast forward til 2011 þegar tUnE-yArDs var nokkurn veginn á repeat hjá mér og ég var, einhverra hluta vegna, búin að steingleyma Thao. Kristín skrifaði um samstarf hennar og Mirah Yom Tov Zeitlyn og plötuna þeirra, sem Merrill Garber pródúseraði einmitt. Áhrifin frá Merrill eru greinileg og samstarfið virkar vel. Þessi lög fá talsverða spilun hjá mér þökk sé uppgötvun og enduruppgötvun á Topp 5.

Tags: Booker T & the MG's, Dan Deacon, Gil Scott-Heron, Merrill Garber, Mirah Yom Tov Zeitlyn, Thao Nguyen, The Ruby Suns, tUnE-yArDs, Xiu Xiu
Flokkað undir Kristjana, Listar | 5 athugasemdir »

Two Toucans

8.5.2012 - Georg Atli

Svona af því að íslenska hip-hop senan er í einhverri uppsveiflu þessa dagana þá langaði mig að benda ykkur á frekar áhugavert band sem ég rakst á um daginn.

Hljómsveitin heitir Two Toucans (sem mér finnst vera ofsalega skemmtilegt stuðlun) og samanstendur af Kristrúnu Lárusdóttur sem sér um sönginn og (bróður hennar) Fonetic Simbol, sem er líklega best þekktur sem taktsmiður Original Melody og hefur verið að gera góða hluti með Immo. Þau hafa verið að gera tónlist saman í um það bil ár og hingað til hafa þau sent frá sér 3 lög (sem má finna á facebookinu þeirra og Soundcloud). Tónlistin þeirra er samt að mörgu leiti mjög ólík O.M. því að Two Toucans minna mun meira á Erykah Badu eða Bilal (enda er þetta R&B) en bara elektróníska útgáfu. Mæli sérstaklega með laginu Shame, sem er rífandi gott, meira svona takk.

Langar líka að bæta því við að einhverra hluta vegna þá minnir tónlist Two Toucans mig á listamenn eins og Pan Sonic og John Hassell… og ég veit alveg hversu undarlegt það kann að hljóma og ég ekki útskýrt þessa tengingu (við jafn ólíka tónlistarmenn) en þessi nöfn koma samt upp í hugann á mér þegar ég hlusta.

Tags: Fonetic Simbol, IMMO, Original Melody, Two Toucans
Flokkað undir Georg Atli | 1 athugasemd »

Þoka, Funk That Shit, Prinspóló og Agent Fresco á Bar 11

8.5.2012 - Kristjana

Það er allt morandi í tónleikum þessa vikuna. Við fengum eftirfarandi frá Bar 11 en þar verður boðið upp á live tónlist á fimmtudags-, föstudags- og laugardagskvöld.

Fimmtudagurinn 10.maí: Þoka – Funk That Shit

Hljómsveitirnar Þoka og Funk That Shit munu leiða saman hesta sína á tónleikum í kjallar Bar 11 fimmtudagskvöldið 10. maí. Sveitirnar vöktu báðar verðskuldaða athygli á Músíktilraunum en þar lenti hljómsveitni Þoka í öðru sæti og Funk That Shit í því þriðja en auk þess unnu liðsmenn hljómsveitanna til einstaklingsverðlauna. Það er því frábært tækifæri fyrir alla tónlistarunnendur að sjá þessar skemmtilegu sveitir á fimmtudaginn.

Tríóið Þoka var stofnað í ársbyrjun 2012 af gítarleikaranum Reyni Haukssyni og hljómborðsleikaranum Heimi Klemenzsyni en síðar bættist svo Agnes Björgvinsdóttir söngkona í hópinn. Þoka leikur ljúfa og ómstríða tóna og stefnir á að gefa út sína fyrstu plötu nú á árinu

Funk That Shit er instrumental fönk band skipað af rythma hljóðfærum, gítar, bassa og trommum. Þeir byrjuðu að “djamma” síðasta sumar en höfðu lítið gert áður en þeir skráðu sveitina í Músíktilraunir 2012. Þar nældi sveitin sér í 3. sætið og bassa- og gítarleikari sveitarinnar fengu titlanna “Bassaleikari Músíktilrauna 2012″ og “Gítarleikari Músíktilrauna 2012″. Gerið ykkur tilbúin fyrir hina nýu “skagfirsku sveiflu”!

Húsið opnar klukkan 21:00 og er aðgangur ókeypis. Einnig verður DJ í búrinu fyrir og eftir tónleika.

Föstudagurinn 11.maí: Prinspóló

Allir tónlistaráhugamenn á Íslandi ættu að hafa heyrt um Prinspóló en hljómsveitin þykir ein sú skemmtilegasta þegar kemur að tónleikahaldi. Hljómsveitin sendi nýverið frá sér lagið Landspítalinn sem þegar hefur fengið góðar viðtökur í útvarpi.

Húsið opnar klukkan 21:00 og verður aðgangur ókeypis. Eftir tónleikar verður svo DJ í búrinu

Laugardagurinn 12.maí: Agent Fresco

Hljómsveitina Agent Fresco þarf ekki að kynna fyrir neinum enda hljómsveitin búin að vera ein öflugasta rokksveit landsins undanfarin ár. Hljómsveitin er einmitt að halda í víkíng til Evrópu og er þetta því kjörið tækifæri til að sjá hljómsveitina á tónleikum áður en að hún heldur út.

Húsið opnar klukkan 21:00 og er aðgangur ókeypis. Eftir tónleika verður svo DJ í búrinu

Tags: Agent Fresco, Funk That Shit, Prinspóló, Þoka
Flokkað undir Kristjana, Tilkynning | Engar athugasemdir »

Agent Fresco á Hressó

8.5.2012 - Kristjana

Það ættu flestir að vera farnir að kannast við styrktartónleikaröð gogoyoko og Hressó. Ef ekki, þá fjölluðum við m.a. um hana hér. Á fimmtudaginn er komið að næsta gogoyoko charity kvöldinu á Hressó og í þetta skiptið verða það Agent Fresco sem spila til styrktar Krabbameinsfélaginu.

Sem fyrr er enginn aðgangseyrir en gestir eru hvattir til að leggja málefninu lið með frjálsum framlögum sem tekið verður á móti á tónleikunum. Gamanið verður á Hressó og hefst kl. 22:30.

Agent Fresco

Agent Fresco þarf nú varla að kynna en sveitin spilar polyrythmískt oddtime-rokk með djass ívafi. Þeir tóku þátt í Músíktilraunum árið 2008 og báru sigur úr bítum, en einnig fengu hljóðfæraleikararnir verðlaun fyrir gítarleik, trommuleik og bassaleik. Á Íslensku tónlistarverðlaununum 2008 hlaut hljómsveitin verðlaun sem Bjartasta vonin.

Agent Fresco hefur gefið út 2 plötur, en sumt efni fyrri plötunnar Lightbulb Universe var endurútgefið á nýjustu plötu þeirra, A Long Time Listening sem kom út í Nóvember 2010.

Framundan á styrktartónleikum Hressó og gogoyoko:

10. maí – Agent Fresco
17. maí – For a Minor Reflection & Futuregrapher
24. maí – Eldar & Chris Wyatt Scott
31. maí – Snorri Helgason

Tags: Agent Fresco, Gogoyoko
Flokkað undir Kristjana, Tilkynning | Engar athugasemdir »

Hjaltalín, Snorri Helgason, Tilbury, Mr. Silla og Borko á styrktartónleikum

8.5.2012 - Kristjana

Á fimmtudaginn verða haldnir styrktartónleikar í Gamla Bíói. Allur ágóði tónleikanna mun renna til uppbyggingar á listasmiðju Galtarvita. Tónlistin, sem boðið verður upp á, er ekki af verri endanum en Hjaltalín, Snorri Helgason, Tilbury, Mr. Silla og Borko munu öll koma fram. Ekki slæmt það!

Tónleikarnir hefjast kl. 21:00 og miðaverð er 1.500 kr. Nánari upplýsingar hér.

Tags: Borko, Hjaltalín, Mr. Silla, Snorri Helgason, Tilbury
Flokkað undir Kristjana, Tilkynning | Engar athugasemdir »

Sin Fang á gogoyoko wireless

8.5.2012 - Kristjana

Níunda útgáfa gogoyoko wireless fer fram í Gym & Tonic – tónleikasal Kex Hostel á föstudaginn. Í þetta skiptið mun Sin Fang koma fram. Húsið opnar kl. 21:00, tónleikarnir hefjast stundvíslega kl. 22:00 og miðasala fer fram á miði.is og við dyr.

Eins og við minntumst á um daginn er svo væntanleg EP-platan Half Dreams frá Sin Fang. Platan kemur út hjá Morr Music í Berlín þann 25. maí en sérstök forútgáfa mun koma út á gogoyoko.com í kringum 20. maí.

Tags: gogoyoko wireless, Sin Fang
Flokkað undir Kristjana, Tilkynning | Engar athugasemdir »

Gabríel sendir frá sér nýtt lag

8.5.2012 - Kristjana

Grímuklæddi tónlistarmaðurinn Gabríel var að senda frá sér annað lag, Sólskin, eftir að hafa slegið í gegn með Stjörnuhröp. Í þetta sinn fékk hann Unnstein Manuel úr Retro Stefson og Opee, fyrrum meðlim Quarashi, með sér í lið.

Við gerð lagsins var öllu tjaldað til, en hljómjöfnun var í höndum hins virta Chris Athens, sem hefur m.a. hljómjafnað plötur fyrir stórstjörnur á borð við Usher, Coldplay, Beastie Boys, AC/DC, Johnny Cash, The Notorious B.I.G, Nas, Erykah Badu, P. Diddy og svo mætti lengi telja.

Gabríel er þegar farinn að huga að sínu þriðja lagi auk þess að vera með fleiri járn í eldinum, en hann er til að mynda í hóp fyrstu sveita sem staðfestar hafa verið á Airwaves í haust.

Tags: Airwaves, Gabríel, Opee, Quarashi, Retro Stefson, Unnsteinn Manuel
Flokkað undir Airwaves, Kristjana, Óflokkað | Engar athugasemdir »

Sigur Rós á Airwaves

8.5.2012 - Kristjana

Line-upið á Airwaves ársins lítur ansi vel út og í morgun var tilkynnt að Sigur Rós mun koma fram á hátíðinni í fyrsta skipti í 11 ár (Georg reyndist semsagt sannspár). Hátíðargestir fá víst 11 manna band og lög af öllum plötum hljómsveitarinnar í Laugardalshöllinni á sunnudagskvöldinu.

Hins vegar kostar aukalega á þessa lokatónleika, 3.900 kr ef maður á armband á hátíðina (hægt verður að kaupa miða frá 16. maí á miði.is). Hvað finnst ykkur – sanngjarnt eða kjánalegt að taka eina tónleika út fyrir sviga og skella auka verðmiða á þá?

Tags: Airwaves 2012, Sigur Rós
Flokkað undir Airwaves, Kristjana | Engar athugasemdir »