Íslenskur vínylmarkaður á Kexinu!

22.11.2012 - Georg Atli

Íslensk vínyl útgáfa stendur í miklum blóma þessi misserin enda er fátt eigulegra en góð (íslensk) tónlist á vínylplötu. Titlarnir hrúgast út í búðirnar í allskonar útgáfum, litaðar plötur, númeraðar plötur tvöfaldar plötur, 10″ plötur og allskonar margt fleira. Þess vegna er mér sérstaklega gleðilegt að birta þessa tilkynningu sem við fengum um Íslenskan vínyl markað semverður á Kex hostel á laugardag. Það Snorri Helgason sem stendur á bak við þetta skemmtilega framtak og þú getur (ef þú ert tónlistarmaður með “brakandi ferskan vínyl í pokahorninu”) meira að segja fengið að vera með, sendu bara póst á Snorra Helgason

Þeir sem ætla að vera með eru (ekki tæmandi listi því að það er alltaf að bætast nöfn við, best að fylgjast með á facebook):

Snorri Helgason, Borko, Tilbury, Retro Stefson, Ojba Rasta, Múm, Ásgeir Trausti, Ólöf Arnalds, Sin Fang, Legend, The Heavy Experience, Prinspóló, Hjálmar, Sigurður Guðmundsson og Memfismafían, Of Monsters and Men, For a Minor Reflection, Moses Hightower, Kira Kira, Valdimar, Berndsen og Lay Low.

Markaðurinn verður á Kex hostel á laugardaginn á milli 13 og 17 og það verður meira að segja lifandi tónlist líka! Hér er event-inn aftur.

Þangað til getið fengiuð smá innsýn inn í plötusafn Cut Chemist (Ozomatli, Jurassic 5)

Tags: Ásgeir Trausti, Berndsen, Borko, For a Minor Reflection, Hjálmar, Kira Kira, Lay Low, Legend, Moses Hightower, Múm, of monsters and men, Ojba Rasta, Ólöf Arnalds, Prinspóló, Retro Stefson, Sigurður Guðmundsson og Memfismafían, Sin Fang, Snorri Helgason, The Heavy Experience, Tilbury, Valdimar
Flokkað undir Georg Atli, Tilkynning | Comments Off

Lay Low – Brostinn Strengur

14.2.2012 - Georg Atli

Brostinn Strengur er 5 plata Lay Low, ef sándtrakkið úr leikritinu Ökutímar og tónleikaplatan Flatey eru teknar með. Hérna er hún að leika sér með ljóð nokkura íslenskra ljóðskáld (sem eru allt konur) og útsetur ljóðin þeirra listavel. Lovísa hefur augljóslega gott vald á forminu sem hún valdi sér, því að það er ekki auðvelt að fanga tilfinninguna í ljóðum annara skálda. Eitt lag á plötunni er þó algerlega eftir Lay Low sjálfa en það er lagið Gleðileg Blóm.

Lag: Gleðileg Blóm

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Á þessari plötu syngur Lay Low eingöngu á íslensku og þetta er fyrsta platan sem er eingöngu sungin á íslensku (það eru nokkur íslensk lög á Ökutímaplötunni samt) og það er ótrúlegt hvað það hefur í raun lítið að segja, það passar bara svo rosalega vel við Lay Low og sérstaklega þessi lög að maður veltir því ekkert fyrir sér og það stendur ekki uppúr sem hápunktur á plötunni. Maður hefur vanist því að Lay Low syngi á ensku og hún gerir það mjög vel (fyrri plöturnar hennar eru frábærar) og það er oft sem að þegar listamenn breyta sínum stíl á einn eða annan hátt þá “stingur það í eyrun”, eða svoleiðis (mér fannst það t.d. miklu meiri breyting þegar Mugison gerði það, þó að það heppnist líka vel). Hérna gerist það ekki.

Lag: Gleym Mér Ei

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Eitt af því sem hefur einkennt Lay Low er hversu miklum breytingum tónlistinni hennar er á milli platna. Á fyrstu plötu Lay Low var undirleikurinn nánast eingöngu kassagítar og trommur og á Farewell Good Night’s Sleep var komið að kántrý-inu. Á Brostinn Strengur er aftur á móti fjöldinn allur af hljóðfærum og mörg trommusóló í einum graut og meira að segja 2 kórar.

Lag: Horfið

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Tilfinningin í lögunum er þægileg og ofsalega “íslensk” og textarnir er sérstaklega flottir. Tónlistin/útsetningin er falleg og flutningurinn í heild sinni er frábær. Það sem að mér finnst samt heppnast best við þessa plötu og standa uppúr er samspilið á milli raddar Lay Low og tónlistarinnar. Viðkvæm röddin hennar fer einstaklega vel með textanna og kallast sérstaklega vel við stóran og hlýjan hljóm hljómsveitarinnar, sem minnir mig á köflum á big band, sem gæfir yfir í bakgrunninum.

Þrátt fyrir vel valin ljóð ljóðskáldanna og vel framkvæmdann flutning á þeim þá nær platan ákveðnum hápunkti í titillaginu Brostinn Strengur en það lag er samið af Lay Low og textinn er eftir Hugrúnu

Lag: Brostinn Strengur

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Brostinn Strengur er allra besta plata Lay Low til þessa. Platan er fínt merki þess að í Lay Low höfum við virkilega hæfileikaríkann tónlistarmann sem að er óhrædd við það að þroskast og þróa sinn stíl. Platan er allt í senn fíngerð og kraftmikil, skemmtileg og falleg og það er ekki skrítið að hun hafi endað ofarlega á árslistum margra tónlistarrýna í fyrra (m.a. hjá mér).

Platan er gefin út af Senu og það er hægt að kaupa á ýmsum stöðum m.a. í gegnum vefsíðu Lay Low.

Tags: Lay Low
Flokkað undir Georg Atli, Plötuumfjallanir | Comments Off

Topp 5 íslenskar plötur ársins 2011 – Georg Atli

13.1.2012 - Georg Atli

2011 var frábært ár fyrir íslenska tónlist, ég held að ég hafi aldrei haft eins mikið að góðum og frábærum plötum á árslista. Þetta voru reyndar svo margar plötur að ég neyðist til þess að svindla eina erðina enn og koma með miklu lengri lista… og meira að segja að tvískpta listanum sem er ekki topp 5 listinn!. Fyrst koma plötur sem voru sérstaklega góðar eða skemmtilegar eða áhugaverðar og örstutt um hverja plötu.

Mugison – Haglél – Mér finnst þetta vera sæmileg plata með 11 frábærum lögum (sem er kannski ekki rökrétt en samt satt)
Gus Gus – Arabian Horse – Partýplata ársins
FM Belfast – Don‘t Want to Sleep – Eftirpartýplata ársins
Gang Related – Stunts and Rituals – Hressandi nútímastrandarpopprokk í anda Beach Boys
Ham – Svik, Harmur og Dauði – Endurkoma ársins
Futuregrapher – TomTom Bike – Frábært plata sem fór allt of lítið fyrir
Samaris – Hljóma Þú E.P. -Krútraftónlist
Fist Fokkers – Emilio Estavez E.P. – Frábært. Með epískari live böndum íslands.
Dad Rocks! – Mount Modern – Íslenskur Bill Callahan. Reynið að hlusta á lagið Funemployment án þess að fíla það.

Næst koma plötur sem að voru ótrúlega nálægt 5 sætinu á listanum mínum:

Daníel Bjarnason & Ben Frost – Solaris – Klassíska plata ársins
NOLO – Nology – Skemmtilegasta plata ársins.
Skurken – Gilsbakki – Raftónlistarplata ársins.
Of Monsters and Men -My Head is an Animal – Poppplata ársins.
Náttfari – Töf – Síðrokkplata ársins og 6. sætið á listanum mínum

oooog svo Topp 5 plötur ársins!

5. Sóley – We Sink
Ég var búinn að bíða spenntur eftir þessari plötu síðan e.p. platan hennar kom út í fyrra. Ég varð ekki fyrir vonbrigðum. Sóley tekst að búa til einhvern ótrulega fallegan hljóðheim sem að maður getur ekki annað en sogast inn í.

4. Lay Low – Brostinn Strengur

Lay Low gerði frábæra plötu með frábærum lögum við frábær ljóð nokkura kvenna. Það passar ótrúlega vel við hana að syngja á íslensku og hún nær rosa vel inn á þessa íslensku tilfinningu.

3. Reykjavík! – Locust Sounds

Stórkostleg plata í alla staði. Reykjavík! náði að rífa hljóminn sinn upp á alveg nýtt plan og gæði tónlistarinnar urðu miklu meiri.

2. Sin Fang – Summer Echoes

Sindri er örugglega einn af ferskari og frumlegri tónlistarmönnum Íslands. Hann hleður upp hljóðum og tónum í einhverja ótrúlega flókna tónlistarsúpu þar sem að maður heyrir eitthvað nýtt við hverja hlustun.

1. Snorri Helgason – Winter Sun

Einfaldlega besta plata ársins. Frábær í alla staði, lögin og útsetningarnar eru góðar, textinn er góður og hljóðfæra leikurinn góður. Snorri Helgason fann sig greinilega ótrúlega vel í stúdíóinu með Sindra (Sin Fang og Seabear).

Tags: Lay Low, Reykjavík!, Sin Fang, Snorri Helgason, Sóley
Flokkað undir Georg Atli, Listar | Comments Off

Topp 5 íslenskar plötur 2011 – Kristín Gróa

13.1.2012 - Kristín Gróa

Árið 2011 er í mínum huga ár íslenskrar tónlistar. Það kom út alveg gríðarlegt magn af vönduðum og skemmtilegum plötum og ég hef persónulega aldrei hlustað jafn mikið á íslenska tónlist. Húrra fyrir íslenskum tónlistarmönnum! Að vanda skulum við byrja á 10 plötum sem náðu ekki á topp fimm en mér þykir samt vert að minnast á:

Lay Low – Brostinn strengur
GusGus – Arabian Horse
Snorri Helgason – Winter Sun
Nolo – Nology
Vigri – Pink Boats
FM Belfast – Don’t Want To Sleep
Orphic Oxtra – Kebab diskó
Gang Related – Stunts & Rituals
ADHD – ADHD2
Ben Frost & Daníel Bjarnason – SÓLARIS

5. Reykjavík! – Locust Sounds

Rokkplata ársins! Gríðarlega metnaðarfull og skemmtileg plata sem rokkar fyrir allan peninginn. Ég hafði fram að þessu aldrei hlustað mikið á Reykjavík! en hafði horft dáleidd á þá live enda leitun að betra live bandi. Nú er ég farin að hlusta og mun aldrei hætta.

4. Mugison – Haglél

Þetta er líklega plata ársins svona almennt séð enda náði hún til allra. Ég hef aldrei hitt neinn sem hefur nokkuð slæmt um Mugison eða hans tónlist að segja og þar held ég einmitt að töfrarnir séu. Hann er allra. Hann er nógu kúl fyrir hipsterana en nógu alþýðlegur fyrir ömmurnar. Allir vinna. Það er frábært að sjá viðtökurnar við þessari plötu og þær eru algjörlega verðskuldaðar. Þetta er í raun látlaus lítil plata en stundum er minna meira.

3. Sin Fang – Summer Echoes

Þessi plata er líklega andstaðan við Haglél. Hér er ekkert lítið, látlaust eða einfalt heldur allt svo gríðarlega flókið og samofið að þegar ég hlusta þá get ég ekki annað en velt því fyrir mér hvernig í fjáranum maðurinn fer að því að láta þetta allt passa svona fullkomnlega saman. Mér finnst platan sterk út í gegn en ég heillaðist samt mest af laginu Fall Down Slow sem varð mitt fyrsta ofspilaða lag ársins 2011.

2. Sóley – We Sink

Ég viðurkenni að þegar ég hlustað á Theater Island í fyrsta sinn þá náði ég henni ekki alveg en eftir að hafa séð Sóley spila live þá gaf ég henni annan séns og heillaðist algjörlega. Ég beið því We Sink með mikilli eftirvæntingu og varð engan veginn fyrir vonbrigðum. Mér finnst ég vera að fara inn í annan heim þegar ég set þessa plötu af stað og í hvert sinn hlusta ég frá upphafi til enda… nema kannski þegar ég er að spila Smashed Birds á repeat en það er algjörlega uppáhalds. Það er líka alveg ofboðslega gaman að heyra lögin af plötunni live en Sóleyju og Jóni Óskari tekst á einhvern undraverðan hátt að spila bara tvö en koma samt öllu til skila.

1. Of Monsters And Men – My Head Is An Animal

Það má alveg ásaka mig um að vera hlutdræga þegar kemur að Of Monsters And Men og ég skal alveg gangast við því. Ég get hins vegar lofað því að ég myndi ekki setja þau á toppinn á árslistanum mínum óverðskuldað og staðreyndin er sú að hef ekki hlustað jafnmikið á nokkra íslenska plötu á árinu. Mér finnst hún alltaf skemmtileg, fæ aldrei leið á lögunum og syng með hverju lagi. Mér finnst ekki eitt slakt lag á þessari plötu og ég er ekki hissa á að EP platan Into The Woods hafi toppað Billboard Heatseekers listann. Framtíðin er björt!

Tags: adhd, Ben Frost, Daníel Bjarnason, FM Belfast, Gang Related, GusGus, Lay Low, Mugison, Nóló, of monsters and men, Orphic Oxtra, Reykjavík!, Sin Fang, Snorri Helgason, Sóley, Vigri
Flokkað undir Kristín Gróa, Listar | Comments Off

XMAS 2011 – til minningar um Hermann Fannar Valgarðsson

19.12.2011 - Georg Atli

Annað kvöld verður blásið til stórviðburðar í Hafnarfirðinum. Þar verða árlegir jólatónleikar X-ins (XMAS) sem að í þetta skiptið verða haldnir í minningu Hermanns Fannars, fyrrum alt muligt manns sem lést langt fyrir aldur fram í nóvember. Tónleikarnir eru (svona svolítið eins og Hemmi) aðeins öflugri en flest annað sem er í gangi í dag og flest stærstu nöfnin eru þarna (smellið á myndina að ofan til að sjá betur) og svo er líka mjög gaman að geta bent á það að hljómsveitin Súrefni ætlar að koma aftur saman og trylla gesti.

Allir eru að gefa vinnu sína og allur ágóði af miðaverðinu (sem er, að ég held, allt verðið) rennur svo í styrktar sjóð fjölskyldu Hemma þannig að þarna gætuði verið að skemmta ykkur frábærlega OG gera jólagóðverk ársins, sem verður að segjast að er ansi góður díll!

Svo ef að þið komist ekki eða hreinlega nennið ekki á tónleikana þá er líka hægt að leggja inn á þennan reikning:
Reikningsnr: 545-14-403403
Kennitala: 180507-3610

Eftir tónleikana verða svo fríar rútuferðir úr Hafnarfirði og inn í Kópavog, Garðabæ og að sjálfsögðu líka inn í höfuðborgina, þannig að fjarlægðin er engin ástæða fyrir því að sleppa þessu!
Hérna er hægt að kaupa miða og svo er hægt að læka hér og horfa á smá vídjó/auglýsingu fyrir viðburðinn sem útskýrir allt aðeins betur.

Tags: Bogamil Font og Félagar, Dikta, Dr. Spock, Ensími, Friðrik Dór, Hjálmar, Jón Jónsson, Lay Low, Mugison, of monsters and men, Ourlives, Pollapönk, Retro Stefson, Reykjavík!, Samaris, Súrefni, Vicky
Flokkað undir Georg Atli, Tónleikar | Comments Off

Lay Low, Benni Hemm Hemm og Prinspóló tilkynna tónleika

8.12.2011 - Kristín Gróa

Tilkomumikill lúðraþytur í bland við lágstemmt þjóðlagapopp hefur verið einkennismerki Benna Hemm Hemm alla tíð og þetta kvöld verður engin breyting þar á. Talið verður jafnt í sígilda slagara sem og nýrra efni.

Lay Low kemur nú fram með hljómsveit en þau hafa verið dugleg að spila víðs vegar um landið í haust. Nýja platan hennar sem kom út nú á dögnum, Brostinn strengur hefur heldur betur fengið góðar viðtökur. Fullt fullt af stjörnum komnar í hús og yfirlýsingar um að þetta sé besta plata Lay Low til þessa. Það getur vel verið, enda var mikið lagt í þessa fyrstu plötu Leiló á íslensku.

Prinspóló gaf í fyrra haust út hljómplötuna Jukk og hafa lög eins og Niðrá Strönd, Hakk & Spaghettí og Skærlitað gúmmulaði límst í huga einhverra. Hljómsveitin hefur verið iðin við tónleikahald á Íslandi og einnig og lagt undir sig nokkur lönd í Evrópu, þar á meðal Pólland. Prinspóló er hugarsmíð Svavars Eysteinssonar frá Breiðholti og með honum leikur hin konunglega hirð.

Faktorý
Föstudaginn 9. desember
Húsið opnar 21:30
Tónleikar hefjast kl 22
1000 krónur

Tags: Benni Hemm Hemm, Lay Low, Prinspóló
Flokkað undir Kristín Gróa, Tilkynning, Tónleikar | Comments Off

Úrvalslisti Kraums

7.12.2011 - Georg Atli

Nú er desember og árslok nálgast óðfluga, en þá er einmitt frábærlega gaman (og erfitt) að vera tónlistarnörd og kynna sér alla árlistanna. Hér á Íslandi er það yfirleitt (amk undanfarin ár) tónlistasjóðurinn Kraumur sem ríður á vaðið með sinn 20 plötu úrvalslista. Sá listi var birtur í gær en endanlegur listi verður svo birtur 16. des.

Samkvæmt heimasíðu Kraums fer valið fram á eftirfarandi hátt:

Framkvæmd Kraumslistans 2011 er með þeim hætti að sex manna dómnefnd valdi 20 plötur á Úrvalslista Kraumslistans en við honum tekur 20 manna dómnefnd og velur bestu plöturnar þannig að eftir standa 5 til 6 verðlaunaplötur

Dómnefnd Kraumsverðlaunanna er skipuð 20 aðilum sem allir hafa mikla reynslu af því að hlusta á og fjalla um íslenska tónlist á ýmsum sviðum fjölmiðla. Formaður dómnefndar er Árni Matthíasson.

Í úrvalslistanefnd áttu sæti ásamt Árna Matthíassyni: Andrea Jónsdóttir, Trausti Júlíusson, Egill Harðarson, Helena Þrastardóttir og Hildur Maral Hamíðsdóttir.

Þessar plötur komust á úrvalslistann:

• ADHD – ADHD2
• Anna Þorvalds – Rhízoma
• Ben Frost og Daníel Bjarnason – SÓLARIS
• Dead Skeletons – Dead Magick
• FM Belfast – Don’t want to sleep
• For a Minor Reflection – EP
• Helgi Hrafn Jónsson – Big Spring
• Hljómsveitin Ég – Ímynd Fíflsins
• Lay Low – Brostinn Strengur
• Nolo – Nology
• Of Monsters and men – My Head is an Animal
• Ofvitarnir – Stephen Hawking/Steven Tyler
• Ragga Gröndal – Astrocat Lullaby
• Reykjavík! – Locust Sounds
• Samaris – Hljóma Þú (ep)
• Sin Fang – Summer Echoes
• Skurken – Gilsbakki
• Snorri Helga – Winter Sun
• Sóley – We Sink
• Sólstafir – Svartir Sandar

Tags: adhd, Anna Þorvalds, Ben Frost, Daníel Bjarnason, Dead Skeletons, FM Belfast, For a Minor Reflection, Helgi Hrafn Jónsson, Hljómsveitin Ég, Lay Low, Nóló, of monsters and men, Ofvitarnir, Ragga Gröndal, Reykjavík!, Samaris, Sin Fang, Skurken, Snorri Helgason, Sóley, Sólstafir
Flokkað undir Georg Atli | Comments Off

Tónleikar vikunnar

17.8.2011 - Kristín Gróa

Þar sem það er menningarnótt á laugardaginn og svo ótalmikið af frábærum tónleikum og viðburðum þá ætlum við aðeins að tala um dagskrá fimmtudags og föstudags í þetta sinn. Til þess að sjá hvað er í gangi á laugardaginn er best að fara beint inn á síðu menningarnætur.

Fimmtudagur

Fyrra kvöldið af tveimur á ólympíuleikum trúbadora fer fram að Merkigili á Eyrarbakka. Tónleikarnir hefjast kl. 21:00 og kostar aðeins þúsund krónur inn. Sjá nánar hér.

Á Bar 11 verður enn og aftur kreppukvöld sem þýðir basically ódýrt áfengi og ókeypis inn. Ekki hægt að kvarta yfir því! Í þetta sinn er það hljómsveitin 1860 sem stígur á stokk. Húsið opnar 21:00. Sjá nánar hér.

Hjá Hemma og Valda fer fram Heiladans 5 en í þetta sinn koma fram Cold, Jafet Melge, Yagya og Exos. Herlegheitin hefjast kl. 21:00 og það kostar ekkert inn. Sjá nánar hér.

Á Rósenberg munu Lára Rúnars og Mugison flytja nýtt efni. Húsið opnar kl. 21:00, tónleikarnir hefjast kl. 22:00 og það kostar 1500 krónur inn. Sjá nánar hér.

Á Faktorý verða NEI tónleikar gegn kynferðisofbeldi. Tónleikarnir hefjast kl. 21:00 og fram koma Lay Low, Lockerbie, Of Monsters And Men og Uppistandsstelpur. Það kostar ekkert inn en óskað verður eftir frjálsum fjárframlögum til að styrkja átakið. Sjá nánar hér.

Föstudagur

Á Bar 11 heldur sumartónleikaröð Bar 11 og Tuborg áfram en í þetta sinn er það Pétur Ben sem kemur fram. Tónleikarnir hefjast kl. 23:00 og það er frítt inn. Sjá nánar hér.

Á Rósenberg verða tónleikar með hljómsveitinni Brother Grass. Tónleikarnir hefjast kl. 22:00 og það kostar 1000 krónur inn. Sjá nánar hér.

Á Faktorý verða kveðjutónleikar hljómsveitarinnar Rökurró en þau eru að taka sér smá hlé. Auk hljómsveitarinnar koma fram Agent Fresco, Útidúr og Úlfur Úlfur. Húsið opnar kl. 22:00, tónleikarnir hefjast kl. 23:00 og það kostar 1000 krónur inn. Sjá nánar hér.

Á NASA verða styrktartónleikar fyrir sveitarfélögin. Þarna verða Páll óskar, Jón Jónsson, Frikki Dór, Dikta, Ourlives, Lára Rúnars, Valdimar og Mugison að spila og það kostar bara 1000 kr. inn (má eflaust borga meira). Húsið opnar kl. 22:00

Tags: 1860, Agent Fresco, Brother Grass, Cold, Dikta, Exos, Frikki Dór, Jafet Melge, Jón Jónsson, Lára Rúnars, Lay Low, Lockerbie, Mugison, of monsters and men, Ourlives, Páll Óskar, Pétur Ben, Rökurró, Úlfur úlfur, Útidúr, Valdimar, Yagya
Flokkað undir Kristín Gróa, Tónleikar | Comments Off

Tónleikasamantekt

4.5.2011 - Georg Atli

Fullt af tónleikum eins og venjulega og við ætlum að taka þá saman og setja í eina færslu ykkur til yndisauka. Ef það er eitthvað sem að við gleymum/vitum ekki af endilega látiði okkur vita með því að senda okkur smá línu, t.d. hér, hér eða jafnvel í pósti, toppfimmafostudegi[hjá]gmail.com

Miðvikudagur

Á Rósenberg verða Steini Eggerts og Óperuídýfurnar að syngja um lífið. Byrjar kl. 21:00 og miðinnm kostar 1500 kr.

Fimmtudagur

Í Tjarnarbíói munu Bjartmar og Bergrisarnir fagna plötunni Skrýtin veröld og góðu ári með tónleikum. Tónleikarnir hefjast kl. 21:00 og það kostar 2500 krónur inn. Miðasala á midi.is.

Á Rósenberg verður Rokkabillýband Reykjavíkur með sína árlegu vortónleika. Tónleikarnir hefjast kl. 21:00 og það kostar 1800 krónur inn. Miðasala á midi.is. Sjá nánar hér.

Á Dillon verður mikið af tónlist en þar koma fram The Assasin Of A Beautiful Brunette, Postarctica og The Wicked Strangers. Tónleikarnir hefjast kl. 22:00 og það er frítt inn. Nánari upplýsingar hér.

Á Norðurpólnum verða þriðju tónleikarnir í tónleikaröðinni ‘Rafmagnslaust á Norðurpólnum’ og í þetta sinn eru það Svavar Knútur og Hljómsveitin Ég sem koma fram. Tónleikarnir hefjast stundvíslega kl. 21:00 og það kostar 1500 krónur inn. Sjá nánar hér.

Á Hressó verður Valdimar með tónleika sem eru hluti af tónleikaröð Gogoyoko. Tónleikarnir hefjast kl. 22:00 og er frítt inn á meðan húsrúm leyfir. Sjá nánar hér.

Á Faktorý verður rótarkvöld með Atla Kanilsnúð. Sjá nánar hér.

Á Boston verður franski tónlistarmaðurinn Michael Wookey að spila frá kl. 21:00.

Á Prikinu verður mánaðarlegt breakbeat.is kvöld en þar koma fram Maggi B, Kalli og Skeng. Hefst klukkan 21:00 og það er frítt inn. Sjá nánar hér.

Föstudagur

Á Dillon koma fram hljómsveitirnar Gang Related, Ofvitarnir og No To Self. Tónleikarnir hefjast kl. 22:00 og það er frítt inn. Sjá nánar hér.

Á Faktorý verður Svínarí #2 og þar verða hljómsveitirnar Who Knew, Hellvar og The Hydrophobic Starfish. Húsið opnar kl. 22:00, tónleikarnir hefjast kl. 23:00 og það er frítt inn. Sjá nánar hér.

Á Sódóma verður bandaríska hljómsveitin White Cowbell Oklahoma með tónleika. Einnig koma fram The Vintage Caravan og Texas Muffin. Tónleikarnir hefjast kl. 22:00 og það kostar 1000 krónur inn. Sjá nánar hér.

Á BAR11 verður Wildcat rockabilly tryllingur með El Camino, 59′ers, Haffa Haff, Daníel Ágúst og Krumma. Frítt inn. Sjá nánar hér.

Laugardagur

Á Rósenberg verða tónleikar með Láru Rúnars og Lay Low. Tónleikarnir hefjast kl. 21:00 og það kostar 1000 krónur inn. Sjá nánar hér.

Á efri hæðinni á Faktorý verða hljómsveitirnar Valdimar og Æla með tónleika. Tónleikarnir hefjast kl. 23:00 og það kostar 1000 krónur inn. Sjá nánar hér. Á neðri hæðinni verður DJ Margeir og það kostar ekkert inn. Sjá nánar hér.

Sunnudagur
Á Rósenberg verður Thor Kristinsson með tónleika, þeir byrja kl. 21:00 og það kostar 1500 kr. inn

Á Faktorý verður SunnuJazzinn á sínum stað

Tags: 59'ers, Bjartmar og Bergrisarnir, Daníel Ágúst, El Camino, Gang Related, Haffi Haff, Hellvar, Hljómsveitin Ég, Kalli, Krummi, Lára Rúnars, Lay Low, Maggi B, No To Self, Ofvitarnir, Postartica, Rokkabillýband Reykjavíkur, Skeng, Svavar Knútur, Texas Muffin, The Assassin of a Beautiful Brunette, The Hydrophobic Starfish, The Vintage Caravan, The Wicked Strangers, Valdimar, White Cowbell Oklahoma, Who Knew, Æla
Flokkað undir Georg Atli, Kristín Gróa, Tónleikar | 2 athugasemdir »

Tónleikar á Air d’Islande í París

22.3.2011 - Georg Atli

Um síðustu helgi var Íslandskynningar hátíðin, Air d’Islande, í París og henni lauk með tónleikum hljómsveitanna Feldberg, Hjaltalín og Lay Low. Tónleikarnir þóttu takast vel og við fengum fréttatilkynningu um það (sem fylgir hér á eftir). við fengum líka voðalega fínar myndir sendar frá ljósmyndaranum Christian Demare. Þetta er allt saman svo voða fínt að ég verð bara að deila þessu með ykkur.

Frábærir íslenskir tónleikar í París

Hjaltalín, Lay Low og Feldberg héldu einstaklega vel heppnaða tónleika á menningarhátíðinni Air d’Islande í París í gærkvöldi.

Tónleikarnir fóru fram á einum frægasta tónleikastað Parísar, Flèche d’Or, og þurfti að vísa fólki frá vegna mikils áhuga á þessum glæsilegu listamönnum. Um 500 manns voru á staðnum og voru viðtökurnar við hinum íslensku tónum hreint út sagt frábærar.

- Það var mjög ánægjulegt að geta boðið Parísarbúum upp á svona skemmtilega tónleikaupplifun og Hjaltalín, Lay Low og Feldberg eiga mikið hrós skilið fyrir frammistöðuna. Þessi mikli áhugi sýnir okkur að Air d’Islande hátíðin er búin að festa sig í sessi hér í París, aðsóknin hefur aldrei verið meiri, segir Ari Allansson, skipuleggjandi hátíðarinnar.

Tónlistarmyndirnar Himininn er að hrynja, en stjörnurnar fara þér vel eftir Gunnar B. Guðbjörnsson og Backyard eftir Árna Sveinsson voru einnig sýndar á hátíðinni í gær. (ath. var á laugardag)

Tags: Feldberg, Hjaltalín, Lay Low
Flokkað undir Georg Atli | Comments Off